Svo gæti farið að launakostnaður fyrirtækja muni rúmlega tvöfaldast nái kröfur Starfsgreinasambands Íslands fram að ganga í komandi kjaraviðræðum. Þetta gæti þýtt að mánaðarlaun hópferðabílstjóra innan Eflingar færu úr 545 þúsund krónum í rúmar 1.080 þúsund krónur á þremur árum.
Fjallað er um þetta í Markaðnum í Fréttablaðinu í dag en hækkunin sem nefnd er hér að ofan nemur 98 prósentum. Þá er bent á það að launahækkun ófaglærðra starfsmanna á veitingahúsum gæti numið allt að 150 prósentum. Þetta er samkvæmt útreikningum sem byggðir eru á kröfugerð samninganefndar Starfsgreinasambandsins.
Björn Ragnarsson, framkvæmdastjóri Kynnisferða, segir að boðaðar hækkanir leggist ekki vel í forsvarsmenn fyrirtækisins. „Það verður að segjast. Ef launahækkanir verða óeðlilega miklar munum við áfram þurfa að halda að okkur höndum, skera niður framboð enn meira og fækka fólki,“ segir Björn sem hefur áhyggjur af því að átök á vinnumarkaði gætu haft áhrif til hins verra á ferðaþjónustuna.
„Ef það verða skærur á vinnumarkaði í byrjun næsta árs, til dæmis í febrúar, mars og apríl þegar bókunartímabil ferðamanna stendur sem hæst, gæti það haft þau áhrif að það yrði algjört hrun í ferðaþjónustunni næsta sumar,“ segir Björn sem bætir við að ekki sé innistæða fyrir miklum launahækkunum. Það myndi skila sér út í verðlag í formi verðbólgu.
Stærstu rútufyrirtæki landsins hafa átt undir högg að sækja að undanförnu og nam samanlagt tap fimm stærstu þeirra um 320 milljónum króna á síðasta ári, að því er segir í Markaðnum. Þar af nam tap Kynnisferða, stærsta fyrirtækisins, 314 milljónum.