Stjórnarandstaðan og ríkisstjórnin funduðu í gærkvöldi og komust að samkomulagi um þinglok. Fallist var á tillögu Katrínar Jakobsdóttur forsætisráðherra, um að fresta veiðigjaldafrumvarpinu fram á haust, en klára þess í stað önnur mál á næstu dögum, líkt og upphaflega var lagt upp með. Verða lögin því óbreytt fram til áramóta. Þetta kom fram í máli forsætisráðherra á morgunvaktinni á Rás 1 í morgun.

Sagði Katrín að gagnrýnin á frumvarpið hefði verið réttmæt, það hefði komið of seint fram og meiri tíma þyrfti til að ræða það.

Hún nefndi einnig að önnur frumvörp hefðu tafið fyrir þinglokum, en skipun stjórnar Íslandsstofu mun hafa verið helsti ásteytingarsteinninn, sem og ný lög um dómstól um endurupptöku dómsmála.

Veiðigjaldafrumvarpið hefur mætt mikilli andstöðu á þingi hjá stjórnarandstöðunni og einnig í baklandi VG. Má því flokka þetta undir einskonar sigur hjá Vinstri grænum og Katrínu Jakobsdóttur, í bili að minnsta kosti, sem hefur legið undir ámæli fyrir að ganga á bak orða sinna um málið, vegna þrýstings frá Sjálfstæðisflokknum, en ætla má að flokkurinn líti á veiðigjaldafrumvarpið sem eitt af lykilmálum hans í ríkisstjórnarsamstarfinu.

Staða VG á landsvísu í sveitastjórnarkosningunum er hinsvegar áhyggjuefni viðurkenndi Katrín og sagði fulla ástæðu til þess að fara yfir þau mál. Hún sagði að ríkisstjórnarsamstarfið með Framsókn og Sjálfstæðisflokknum hefði eflaust haft áhrif, en það væri einnig margt annað sem spilaði þar inn í.