Ég talaði í dag við erlendan mann sem hefur dvalið hér á landi um skeið. Hann spurði yfir hverju Íslendingar væru alltaf að kvarta.

„Þið eigið vel menntaða þjóð, efnilegt ungt fólk, aldurssamsetning þjóðarinnar er góð. Þið eigið gott menntakerfi, góða skóla alveg frá barnsaldri og upp í háskóla og þeir eru mestanpart ókeypis. Menningarlífið er blómlegt. Þið eru hraust þjóð og langlíf, ungbarnadauði er sá minnsti í heiminum. Þið búið við frelsi og frið. Hér er áberandi velmegun hvert sem maður fer, fátækt er lítil og það eru ekki vandamál vegna innflytjenda. Þið eigið gnægð af hreinni orku sem er afskaplega mikilvægt í nútímasamfélagi. Hví kvartið þið svona mikið?“

Ég verð að viðurkenna að mér vafðist tunga um höfuð. Svo fór ég að rekja eitt og annað sem er ekki í sérlega góðu lagi á Íslandi. En er heildarmyndin sem birtist í spurningu ferðamannsins kannski rétt? Hversu glöggt er gestsaugað í þessu tilviki? Það væri gaman að fá svör frá lesendum.