Grikkir virðast upp til hópa sammála um að ekki hafi verið annað hægt en að samþykkja tillögurnar sem Tsipras forsætisráðherra mun nú leggja fyrir Evrópusambandið. Þær fela í sér niðurskurð og skattahækkanir, en líka nokkrar skuldaafskriftir – en allir vita að Grikkir munu aldrei geta greitt allar skuldir sínar.
Tillögurnar voru líka samþykktar í gríska þinginu í nótt með miklum meirihluta, 250 atkvæðum af 300. En þó má geta þess að nokkur hópur innan Syriza, flokks Tsipras, var á móti.
Vissulega má líta svo á að Grikkir hafi gefist upp – einfaldlega látið undan þvingunum Evrópusambandsins. Bankar hafa nú verið lokaðir í tvær vikur. Fólk hefur ekki getað nálgast sína eigin peninga. Það óttast að bankainnistæður muni einfaldlega tapast eða að skorið verði hressilega af þeim. Flestir eru þeirrar skoðunar að það boði ekkert nema óáran og hörmungar að fara yfir í drökmuna aftur – þótt Sigmundur Davíð Gunnlaugsson boði að það sé óumflýjanlegt.
Það er erfitt að láta ekki undan slíkum þrýstingi – en allt setur þetta stórt spurningamerki við evruna og hvernig henni er stjórnað af Evrópska seðlabankanum og Þjóðverjum. Frakkar munu hafa hjálpað Grikkjum við að setja saman tillögurnar og styðja þá – enn er hins vegar spurning hver viðbrögð Þjóðverja verða.
Var þjóðaratkvæðagreiðslan á sunnudag þá til einskis? Því er sums staðar haldið fram. Ekki er það þó víst. Hún snerist ekki bara um peninga. Þjóðaratkvæðagreiðslan birti ákveðna samstöðu og stolt sem oft hefur skort meðal Grikkja. Meira en 60 prósent þjóðarinnar sögðu nei. En það er líka merkilegt að skoða tölfræði sem birtist í Guardian og sýnir hvernig atkvæði skiptast milli ríkra og snauðra.
Þarna má greina að í ríkustu hverfum Aþenu sögðu flestir já, en í hverfunum þar sem býr efnaminna fólk varð neiið ofan á. Þannig að þetta er að einhverju leyti spurning um stéttaskiptingu. Flestir Grikkir hafa engan hag af spillingunni sem hefur verið fyrirferðarmikil í Grikklandi, fyrirgreiðslupólitík, skattaundanskotum og fjármagni sem er dælt úr landi undir eins og gefur á bátinn.
