Hér er tengill á athyglisverða frétt frá 2002. Hún er skrifuð eftir að rætt var í þinginu um hvort forseti Íslands mætti tjá sig um pólitísk deilumál. Halldór Ásgrímsson utanríkisráðherra taldi þá að Ólafur Ragnar Grímsson hefði farið yfir strikið í umræðu um alþjóðavæðingu á ráðstefnu hjá Norðurlandaráði

Í fréttinni er rifjað upp að þegar Ólafur var nýtekinn við embætti fór hann vestur í Barðastrandasýslu og talaði um hvað vegirnir þar væru vondir

Það mátti hann helst ekki segja, jafnvel þótt það væri satt. Reglan var eiginlega sú að forseti mætti ekki tjá sig um neitt sem tengdist pólitík nema spyrja ráðherra leyfis.

Halldór sagði í þinginu 2002:

„Hér er verið að fjalla um það með hvaða hætti forseti Íslands kemur að umræðum í þessu samfélagi. Það urðu miklar deilur um það á sinni tíð þegar forseti Íslands gagnrýndi lélega vegi í Barðastrandarsýslu, það urðu engar deilur um það að vegirnir væru vondir, en mörgum þótti samt forseti Íslands hafa gengið býsna langt þá.“

Nú eru tímarnir breyttir. Það er nokkurs konar stjórnmálakreppa á Íslandi, valdatóm sem Ólafur er að fylla upp í, og nú fer hann milli fjölmiðla og segir það sem honum sýnist – án þess að spyrja ríkisstjórnina.