Í dag er öld liðin frá fæðingu Gísla á Uppsölum. Gísli er stórkostlegasta uppgötvun í íslensku sjónvarpi fyrr og síðar. Mesta skúbbið.
Sjónvarpið reis hæst þegar það fann mann sem átti ekkert sjónvarp.
Síðan hafa margir sjónvarpsmenn leitað að nýjum Gísla en ekki fundið. Sumir eru eins og þeir séu alltaf að leita að Gísla.
En hann var aðeins til í einu eintaki. Ómar Ragnarsson er held ég að fara yfir efnið sem hann tók með Gísla. En það er víst ekki alltaf auðvelt að skilja hvað karlinn er að segja.
Annars eru mér minnisstæð orð sem Ólafur Hannibalsson lét falla í útvarpsviðtali fyrir mörgum árum. Ólafur bjó í Selárdal ásamt öðrum Ólafi og svo Gísla. Þeir voru aðeins þrír í dalnum.
Litlir kærleikar voru með Ólöfunum svo þeir höfðu helst samskipti í gegnum Gísla.
En Ólafur sagði semsagt um Gísla í téðu viðtali:
„Hann var eiginlega ekki vitund skrítinn. Hann lenti bara í þessu.“
Það er fallegt í Selárdal eins og sjá má á meðfylgjandi mynd.
