Hjartnæm en átakanleg mynd sem sýnir hvaða áhrif kórónuveirufaraldurinn hefur á fjölskyldulífið hefur vakið mikola athygli. Á myndinni má sjá tvö börn heimsækja ömmu sína og afa. Börnin geta aðeins séð þau í gegnum glugga og setja höndina á gluggann til að reyna að koma við þau.
Florence, þriggja ára, og Edith, eins árs, voru að heimsækja ömmu sína og afa, þau Theresu og Ray Cossey.
Veðurmaðurinn Chris Page þekkir fjölskylduna og deildi myndinni á samfélagsmiðlum. Síðan þá hefur myndin vakið mikla athygli og hafa fjölmiðlar á borð við The Sun fjallað um hana.
„Þetta er það krúttlegasta sem ég hef séð í allan dag,“ skrifaði Chris með myndinni.
Ray og Therese eru í sjálfskipaðri sóttkví á heimili sínu í Norfolk í Bretlandi. Dóttir þeirra Vickie er vön að koma í heimsókn með barnabörnin einu sinni í viku. Hún ákvað að hætta ekki við heimsóknina þessa vikuna, heldur myndi heimsóknin bara fara aðeins öðruvísi fram.
Eins og sést á myndinni voru Ray og Theresa ánægð með þessa ákvörðun. „Ég veit að það hefur lyft upp andanum þeirra að hafa hitt stelpurnar,“ segir Vickie í samtali við Daily Mail.
„Við vorum búin að sætta okkur við að geta ekki séð börnin, svo að geta bara horft á þær leika sér eins og venjulega var yndislegt,“ segir Ray.
