Fáar ákvarðanir hans hafi þó verið jafn umdeildar og sú sem snýr að Kanada en forsetinn tilkynnti í gær að hann ætlaði sér að setja 50 prósenta toll á stál og ál sem flutt er til landsins frá Kanada í stað 25% tolls sem hann hafði áður tilkynnt um. Hótaði hann viðbrögðum sem lesið verður um í sögubókum framtíðarinnar.
Hefur forsetinn sagt að það besta í stöðunni fyrir Kanada sé að verða 51. ríki Bandaríkjanna, en það er eitthvað sem Kanadamenn kæra sig ekki um.
Egill Helgason fjölmiðlamaður gerði frétt Vísis að umtalsefni á Facebook-síðu sinni í gær en þar var einmitt fjallað um þessa umdeildu ákvörðun Trumps varðandi Kanada.
„Hvaða sturlun er þetta? Kanada! Þetta vingjarnlega fyrirmyndarríki!,“ sagði Egill og var steinhissa á Trump eins og svo margir aðrir sem skrifuðu undir færslu hans.
„Hann verður því miður í sögubókum framtíðarinnar. En held að það verði ekki farið mjúkum höndum um þennan sólóista í þeim skruddum,“ sagði tónlistarmaðurinn Jón Ólafsson.
„Þetta á eftir að enda með einhverjum ferlegum ósköpum. Þetta snýst ekki lengur um neitt nema útblásið egó hins algjöra minnipokamanns þannig að hann getur í rauninni tekið upp á hverju sem er og enginn virðist þess umkominn að stöðva hann,“ sagði Illugi Jökulsson blaðamaður í athugasemd sinni. „Þetta er skelfingin uppmáluð,“ bætti Gestur Valgarðsson við.
Ólíklegt er að Trump verði að ósk sinni um að eignast Kanada ef marka má ummæli forsætisráðherra landsins. „Bandaríkin eru ekki Kanada og Kanada verður aldrei hluti af Bandaríkjunum á neinn hátt. Við báðum ekki um þessi slagsmál en Kanadamenn eru tilbúnir þegar einhver hendir af sér hönskunum,“ sagði forsætisráðherrann, Mark Carney á dögunum.
