Auk Grænhöfðaeyja eru Kúba og Slóvenía með Íslandi í riðli. Það á að vera algjört formsatriði að vinna fyrstnefndu liðin. „Þetta eru í mesta lagi fyrstu 12 mínúturnar sem þetta er einhver leikur. Svo er þetta farið,“ sagði Þorkell um leik kvöldsins og viðureignina gegn Kúbu á laugardag.
Á mánudag leikur íslenska liðið svo við Slóvena og þar er mikið undir. Að öllum líkindum eru bæði lið að fara inn í milliriðla og það getur skipt sköpum að taka með sér sem flest stig þangað.
„Það er ekki allt undir þar. Við förum í milliriðil því það eru þrjú lið sem fara áfram upp úr þessum riðli. Þar mætum við Króatíu, Egyptalandi og svo Argentínu eða Barein. Við eigum að vinna Argentínu og Barein. Króatía og Egyptaland eru góð lið þó mér hafi fundist Króatar lélegir á síðasta ári. En þeir eru á heimavelli og geta farið langt á því. Egyptar eru Afríkumeistarar og eru í raun bara langbesta liðið utan Evrópu í dag. Ef við töpum fyrir Slóveníu þurfum við að vinna bæði þessi lið til að fara í 8-liða úrslit,“ útskýrði Þorkell.
Töluverð umræða hefur verið undanfarna daga um að leikmenn Íslands í dag skorti ákveðinn karakter og „íslenska geðveiki“ sem áður var áberandi. Þorkell getur að einhverju leyti tekið undir þetta en segir þó tímana breytta.
„Leikmenn eru tæknilega betri. Þeir eru ekki að fara þetta jafn mikið á hörkunni og kraftinum og áður. En auðvitað væri langbest að geta farið einhvern milliveg og fengið skapið í þessum gaurum inn í liðið. Manni finnst það stundum vanta.“
Einnig var rætt um vonir og væntingar til íslenska liðsins á mótinu. Þjóðin lætur sig dreyma um verðlaunapall en hvernig sér Þorkell þetta fyrir sér.
„Verðlaunapallur er toppurinn. Svo eru 8-liða úrslit viðunandi. Að komast ekki í 8-liða úrslit yrðu vonbrigði. Við dettum aldrei úr leik í riðlakeppninni svo bara það að komast ekki upp úr milliriðlinum yrðu vonbrigði miðað við hvernig leiðin er, hún er vel fær,“ sagði hann.
Upphitunarþáttinn fyrir HM í handbolta má sjá í spilaranum, eða hlusta á helstu hlaðvarpsveitum.
