Arnar, sem er auðvitað þjálfari karlaliðs Víkings, kemur til greina ásamt Frey Alexanderssyni og erlendum þjálfara. Freyr er einnig sterklega orðaður við norska stórliðið Brann.
„Þetta var mjög góður fundur. Heiðarleg samskipti og menn fóru yfir ákveðin mál, og hvernig þeir sæju framtíðina fyrir sér. Í stuttu máli þá talaði ég um að ég hefði áhuga á þessu, og fannst líka mikilvægt að um leið og menn byrja að tala um framtíðina þá geri menn upp fortíðina líka, af heilindum. Horfist í augu við hvar landsliðið stendur í dag og hvað má mögulega bæta og gera betur,“ sagði Arnar við Vísi að loknum fundi á Hilton Nordica í dag.
Age Hareide hætti sem landsliðsþjálfari fyrir áramót og mun fyrsta verkefni nýs þjálfara vera umspil um að halda sæti Íslands í B-deild Þjóðadeildarinnar. Svo tekur við undankeppni HM.
„Hver sem verður valinn þá held ég að þetta sé mikilvægasta ráðning í íslenskum fótbolta í langan, langan tíma. Það er rosalegt „potential“ í landsliðinu núna og sá aðili sem verður valinn þarf að hafa marga góða og sterka eiginleika. Ekki bara fótboltalega séð heldur líka fyrir utan völlinn.
Ég skynja það að íslenskir knattspyrnuáhugamenn eru að biðja um sterkt nafn til að leiða veginn áfram, þannig að ég held að stjórn KSÍ geri sér alveg greið fyrir sinni ábyrgð á að rétti aðilinn verði fyrir valinu. Það má ekki gera mistök núna, því það er svo mikið í húfi.“
