Pep Guardiola ítrekar það að hann sé ekki að kveðja Manchester City og að hann muni gera allt mögulegt til að snúa gengi liðsins við.

City hefur verið að spila afskaplega illa í undanförnum leikjum og er langt frá toppliði Liverpool.

Guardiola er nýbúinn að skrifa undir nýjan samning við Englandsmeistarana og er ákveðinn í að gera sitt besta til að snúa genginu við.

Spánverjinn hefur verið hjá félaginu frá árinu 2016 en gengið í vetur hefur verið fyrir neðan allar væntingar.

,,Ég mun reyna. Ég mun halda áfram. Stundum heldurðu að það sé auðvelt að laga ákveðna hluti en aðrir hlutir taka lengri tíma,“ sagði Guardiola.

,,Ég gefst ekki upp. Ég vil vera hérna. Ég vil sinna þessu starfi og ég verð að taka þeirri stöðu sem við erum í.“