„Þetta er ánægjulegur dagur. Þetta eru frábærir leikmenn sem við erum að fá inn og frábærir karakterar. Við töluðum um það þegar við fórum upp í haust að við ætluðum að styrkja liðið og þessir leikmenn falla inn í allt sem við erum að gera,“ sagði Magnús Már Einarsson, þjálfari karlaliðs Aftureldingar við 433.isþ

Tilefnið var að Afturelding, sem er nýliði í Bestu deildinni á næstu leiktíð, var að staðfesta komu fjögurra leikmanna. Um er að ræða bræðurna Axel Óskar Andrésson og Jökul Andrésson, sem eru uppaldir í Mosfellsbænum, Oliver Sigurjónsson og Þórður Gunnar Hafþórsson.

„Við ætlum okkur að fara í deildina og festa okkur í sessi. Við þurfum að sýna auðmýkt í því. Við höfum bætt okkur ár frá ári, bæði innan og utan vallar og vaxið sem félag. Við erum bara að stækka sem félag en næsta skref er að halda okkur uppi. En við förum auðvitað í alla leiki með kassann úti og til að vinna.“

Axel og Jökull hafa verið orðaðir við Aftureldingu í nokkrar vikur. Axel kemur frá KR en Jökull var samningsbundinn Reading, en á láni hjá Aftureldingu er liðið fór upp úr Lengjudeildinni í haust.

„Þetta tók smá tíma af ýmsum ástæðum en ég held að þeir hafi alltaf viljað koma hingað. Þeir vildu saman með uppeldisfélaginu í efstu deild. Það eru tíu ár síðan þeir fóru út til Englands.“

Magnús er nú orðinn mjög sáttur við leikmannahóp sinn, þó hann útiloki ekki frekari styrkingar þegar nær dregur.

„Við höfum verið orðaðir við nokkra leikmenn undanfarið en ég get sagt það að það eru bara fjórir leikmenn sem við höfum farið í viðræður við og reynt að fá. Það eru þessir fjórir leikmenn.“