Age Hareide, landsliðsþjálfari Íslands var gagnrýndur á Stöð2 Sport eftir leik í kvöld fyrir það að gera aðeins tvær skiptingar í 2-4 tapi gegn Tyrklandi í kvöld.

Hareide valdi að gera fáar breytingar í leiknum sem Kári Árnason og Lárus Orri Sigurðsson furða sig á.

„Ég hefði viljað sjá fleiri breytingar, fyrsta breyting kemur eftir að við lendum 2-1 undir. Ísak Bergmann fyrir Mikael Neville, þá hefði ég viljað fá Gylfa inn á miðjuna. Arnór Ingvi er varnarmiðjumaður, henda honum inn fyrir hann. Jói orðinn 34 ára að spila sinn annan leik á þremur dögum, hentu Gylfa þarna inn,“ sagði Lárus Orri á Stöð2 Sport.

Gylfi Þór Sigurðsson var ónotaður varamaður í leiknum sem vakti furðu margra þegar íslenska liðið var um tíma að leita að marki.

„Ég er sammála, Gylfi átti alltaf að koma inn í þessum leik og sérstaklega í 2-1. Mér fannst skrýtið að taka Mikael Neville út og setja Ísak Bergmann inn, Ísak er miðjumaður. Jói var þreyttur, Logi var þreyttur. Ég hefði viljað sjá fleiri skiptingar og setja menn í sínar stöður. Sævar Atli var kostur, tvær skiptingar í erfiðum leik. Mikil hlaup, auðvitað átti að gera fleiri skiptingar,“ sagði Kári Árnason.

Lárus segir að sá norski verði að lesa betur í stöðuna. „Þú verður að lesa í leikinn og hvernig hann þróast, við þurftum breytingu á miðsvæðinu.“