Skýrsla starfshóps um hugsanlega byggingu flugvallar í Hvassahrauni var kynnt á blaðamannafundi nú á tólfta tímanum. Meginniðurstaða skýrslunnar er að niðurstöður rannsókna útiloki ekki byggingu flugvallarins, bæði hvað varðar veðurfar og náttúruvá, sem yrði þá ætlaður fyrir innanlandsflug, kennsluflug og þyrluflug. Svandís Svavarsdóttir innviðaráðherra segir þó ekki enn komið að því að taka endanlega ákvörðun um hvort af byggingu flugvallarins verðo.

Þetta sagði Svandís í lok fundarins. Hún hrósaði starfshópnum og sagði skýrsluna vandaða og skapa góðan grunn að frekari rannsóknum og vinnu áður en komi að því að taka endanlega ákvörðun um hvort ráðist verði í byggingu flugvallar í Hvassahrauni. Skýrslan verði nýtt til frekari vinnu við að móta endanlegur tillögur að því hvort flugvöllurinn eigi að verða að veruleika.

Einar Þorsteinsson segir skýrsluna mikilvægt innlegg í þá vinnu sem vinna þurfi í ljósi þess að samkvæmt aðalskipulagi Reykjavíkurborgar fram til ársins 2040 sé gert ráð fyrir að flugvöllurinn sem nú er í Vatnsmýri víki.