Sverrir Magnús prins af Noregi er kominn með vinnu og mögulega kærustu en því er hins vegar haldið leyndu hvar hann er að vinna.

Sverrir Magnús er yngra barn Hákons krónprins og Mette Marit krónprinsessu. Hann er í þriðji í erfðaröðinni að norsku krúnunni, næst á eftir föður sínum og eldri systur, Ingiríði Alexöndru.

Norska ríkissjónvarpið NRK greinir frá því að prinsinn sé fluttur til Þrándheims og sé þar í vinnu á ótilgreindum stað.

Það virðist ýmislegt einnig benda til þess að prinsinn sé kominn með kærustu en umrædd kona ku heita Amalie Giæver Macleod en Sverrir Magnús bauð henni með sér í brúðkaup Mörtu Lovísu prinsessu, föðursystur hans, sem giftist bandarískum seiðkarli um liðna helgi.

Amalie Giæver Macleod er einnig flutt til Þrándheims til að starfa í listagalleríi.

Mette Marit segir að sonur hennar verði þó aðeins í Þrándheimi fram að jólum. Hann sé með vinnu þar en ekki verði gefið upp hver vinnustaðurinn er.

Prinsinn er orðinn 18 ára og útskrifaðist úr framhaldsskóla í Osló í vor. Ekki er vitað hvort hann hyggur á frekara nám eða hvað hann muni taka sér fyrir hendur í framtíðinni.

Eldri systir hans mun erfa krúnuna á eftir föður þeirra en krónprinsinn segist búast við því að sonur hans muni finna sinn eigin farveg í lífinu. Hákon segist alveg eins eiga von á því að Sverrir muni gegna opinberu hlutverki í framtíðinni upp að einhverju marki. Það standi hins vegar ekki til að hann muni gegna konunglegum skyldum í fullu starfi eins og systir hans og því verði prinsinn að finna út úr því sjálfur hvað hann vilji gera í lífinu.