KR-ingar voru ósáttir með þá niðurstöðu mótanefndar KSÍ að leikur HK og KR færi fram í næstu viku, leikurinn átti upphaflega að fara fram í síðustu viku.

Leiknum var frestað þegar í ljós kom að eitt markið í Kórnum var brotið, neitaði dómari leiksins að flauta leikinn á.

Mál sem þetta á sér ekkert fordæmi í íslenskum fótbolta en mótanefnd taldi eðlilegast að leikurinn yrði spilaður. KR-ingar voru á öðru máli og eru á því að mögulega eigi að dæma liðinu 0-3 sigur í leiknum.

„Stjórn knattspyrnusambandsins styður við ákvörðun mótanefndar, tillögunni frá KR var vísað frá,“ segir Jörundur Áki Sveinsson starfandi framkvæmdarstjóri KSÍ í samtali við 433.is

Jörundur segir að KR geti áfrýjað þessu til aga og úrskurðarnefndar KSÍ sem tæki þá málið fyrir.

Í reglugerð KSÍ segir að ef ekki er búið að flauta leik á skulu finna næsta lausa dag til að spila hann, við þá reglugerð styðst mótanefnd og stjórn KSÍ í ákvörðun sinni.

Ef KR gerir ekkert meira í málinu er ljóst að liðin mætast í Kórnum á fimmtudag í næstu viku.