Boðað hefur verið til mótmæla víða um Frakkland vegna handtöku hvalfriðunarsinnans Paul Watson. Færeyingar vilja að Watson verði framseldur til Japan til að gjalda fyrir brot sín.
Eins og greint hefur verið frá í fréttum þá situr hvalfriðunarsinninna kanadíski Paul Watson í gæsluvarðhaldi í Grænlandi. Hann var handtekinn í júlí á grundvelli alþjóðlegrar handtökuskipunar sem Japanir báðu um og hafa þeir óskað eftir að Watson verði framseldur fyrir meint brot gegn hvalveiðiskipi í Suður Kyrrahafi árið 2010.
Mikill þrýstingur hefur verið á dönsk stjórnvöld, sem hafa lokaorðið um framsal, á að sleppa Watson. Meðal annars frá Emmanuel Macron Frakklandsforseta og mörgum þingmönnum Evrópuþingsins, en Watson hefur verið búsettur í Frakklandi undanfarin ár. Gæsluvarðhaldið rennur út um miðja vikuna. Verði Watson framseldur á hann yfir höfði sér allt að 15 ára fangelsisdóm, en hann er 73 ára gamall.
Boðað hefur verið til mótmæla víðs vegar um Frakkland á mánudag til að mótmæla handtökunni og hugsanlegu framsali. Einnig hefur verið boðað til mótmæla í Kaupmannahöfn, þar sem ákvörðunin verður tekin um framtíð Watson.
„Ef hann verður framseldur til Japan er hann dauður,“ sagði hin 89 ára gamla fyrirsæta Brigitte Bardot í viðtali við sjónvarpsstöðina LCI. En hún er mikill dýraverndunarsinni og hefur stutt Watson í gegnum tíðina. „Hann er einstök persóna, hetja sem hefur varið lífi sínu í að verja hvali gegn Japönum, gegn japönskum hvalveiðiskutlum.“
Lamya Essemlali, samstarfskona Watson, hefur heimsótt hann á hverjum degi í fangelið í Nuuk, höfuðstað Grænlands.
„Hann veit að Japan er að beita allri sinni pólitísku vigt til að fá hann. Hann er pólitískt merki,“ sagði Essemlali við fréttastofuna AFP. „Jafn vel þó hann sé sekur, þá er augljóst að enginn hefur verið framseldur fyrir svona smávægileg brot. Hann sér ekki eftir neinu. Hann veit að hann gerði rétt.“ En Watson er sakaður um að elta uppi hvalveiðiskip, fara um borð og ráðast að hvalveiðimönnum.
Handtaka Watson hefur einnig hreyft við færeyskum stjórnvöldum sem hafa horn í síðu Watson. En hann hefur lengi beitt sér gegn grindhvalaveiðum Færeyinga.
Í frétt DR segir að færeysk stjórnvöld hafi athugað hvort grundvöllur væri fyrir framsali Watson til Færeyja. Það er hvort að eitthvað opið mál væri í gangi gegn honum.
Það hafi hins vegar ekki reynst raunin að sögn Bjarna Petersen dómsmálaráðherra. Engu að síður hafi Watson truflað Færeyinga.
„Hann hefur gripið til ofbeldis. Hann hefur unnið skemmdarverk og hann hefur sagst reiðubúinn að brjóta lög fyrir málstað sinn,“ sagði Bjarni. „Hann hefur valdið færeysku samfélagi og Færeyingum miklum pirringi.“
Þess vegna telja færeysk stjórnvöld að Watson þurfi að sæta ábyrgð. Ekki aðeins fyrir það sem hann hafi gert í Færeyjum heldur víðs vegar um heim.
