Javier Mascherano, þjálfari landsliðs Argentínu á Ólympíuleikunum, var bálreiður eftir leik sinna manna við Marokkó í gær.

Leiknum lauk með 2-1 sigri Marokkó en Argentína hafði jafnað metin í 2-2 undir lok leiks – það mark var tekið af um klukkutíma eftir að lokaflautið átti sér stað.

Allt varð vitlaust á vellinum eftir mark Argentínumanna og þurftu dómarar leiksins að stöðva viðureignina.

Mascherano segir nú að einn af sínum leikmönnum, Thiago Almada, hafi verið rændur á þriðjudag en leikið var í St. Etienne í Frakklandi.

Mascherano segir að óboðnir gestir hafi brotist inn á hótel Argentínu en hvaða aðila hann er að tala um er í raun óljóst.

,,Í gær þá brutust þeir inn til okkar. Þeir stálu verðmætum frá Almada,“ sagði Mascherano bálreiður.

,,Þeir biðja okkur um vegabréf og þess háttar en svo gerast þessir hlutir. Þeir stálu úrum af honum og hringjum.“

,,Í leiknum þá gerðu þeir sér leið inn á völlinn sjö sinnum og köstuðu blysum í átt að okkur. Þeir vildu ekki spila leikinn.“