Luis Suarez, fyrrum leikmaður Liverpool, svaraði Andreas Pereira, fyrrum leikmanni Manchester United, fullum hálsi í gær.

Pereira gerði marga reiða á dögunum er hann vildi meina að Brasilía væri með mun betri leikmenn innanborðs en Úrúgvæ.

Annað kom í ljós í útsláttarkeppni Copa America þar sem Úrúgvæ sló 2019 meistarana úr leik í vítakeppni.

Suarez bendir á að Úrúgvæ sé með heimsklassa leikmenn í sínum röðum og að það sé vitleysa að segja að Brassarnir séu með mun betra lið.

,,Við erum með bestu miðjumenn heims í okkar liði, þeir eru í heimsklassa,“ sagði Suarez við blaðamenn.

,,Til þess að tjá þig um Úrúgvæ þá þarftu að sýna aðeins meiri virðingu og þekkja sögu landsins.“