Heimir hefur stýrt jamaíska landsliðinu í tæp tvö ár en í gær var greindu miðlar ytra frá því að samband hans við knattspyrnusambandið þar í landi væri slæmt. Hann hættir því þrátt fyrir að eiga tvö ár eftir af samningi sínum.
Jamaíska sambandið þakkar Heimi kærlega fyrir sín störf, en á tíma sínum kom hann liðinu til að mynda í undanúrslit Gullbikarsins og nú síðast inn á Copa America. Þar lauk liðið keppni í nótt án stiga.
Í kjölfar frétta af brotthvarfi Heimis hafa skapast nokkuð miklar umræður á samfélagsmiðlum ytra á meðal stuðningsmanna landsliðsins. Margir gagnrýna knattspyrnusamband Jamaíka.
„Þetta endalausa rót á þjálfurum er eitthvað annað. Við hljótum að sjá nú að knattspyrnusambandið er vandamálið,“ skrifar einn netverji, en Heimir var þriðj þjálfari Jamaíka síðan 2021.
Fleiri tóku í svipaðan streng.
„Vandamálið verður alltaf knattspyrnusambandið og vanhæfni þeirra í öllu sem tengist fótbolta. Það þarf algjöra endurnýjun.“
Einhverjir sjá þó minna á eftir Heimi.
„Ég setti oft stórt spurningamerki við liðsval hans og taktík,“ skrifaði einn.
