Það eru yfirgnæfandi líkur á því að KR láti Gregg Ryder fara sem þjálfara í dag. Samkvæmt heimildum 433.is er líklegt að Pálmi Rafn Pálmason og Bjarni Guðjónsson taki tímabundið við liðinu.

Pálmi hefur verið aðstoðarþjálfari Ryder í sumar og Bjarni er framkvæmdarstjóri félagsins en hættir í því starfi í ágúst.

Stjórn KR hefur rætt málið í dag og hefur það meðal annars komið til tals að Óskar Hrafn Þorvaldsson taki við, það gerist ekki strax.

KR tapaði gegn ÍA í gær og stýrði Ryder æfingu dagsins en svo gæti farið að hann verði rekinn síðar í dag.

Ryder verði fyrsti þjálfarinn í Bestu deild karla sem missir starf sitt á þessu tímabili ef þetta raungerist.

Ryder er á sínu fyrsta tímabili með KR. Óskar Hrafn Þorvaldsson var ráðinn ráðgjafi KR á dögunum en nú er talið líklegt að hann taki við þjálfun liðsins á næstu mánuðum.

Ryder hafði stýrt Þrótti og Þór hér á landi áður en hann fór til Danmerkur. Leit KR að þjálfar síðasta haust var mikið í fréttum en fjöldi þjálfara hafnaði starfinu áður en kom að Ryder.

KR vann fyrstu tvo leiki sumarsins á útivelli en liðið hefur ekki enn unnið leik á heimavelli og er með ellefu stig í Bestu deildinni, aðeins fjórum frá fallsæti.