Íslenska landsliðið í knattspyrnu vann frækinn sigur á Englandi í vináttulandsleik á Wembley í kvöld. Sigurinn kom flestum í opna skjöldu.

Enska liðið stillti upp mjög sterku liði enda var þetta síðasti æfingaleikur liðsins fyrir Evrópumótið í Þýskalandi sem hefst í næstu viku.

Jón Dagur Þorsteinsson skoraði eina mark leiksins í fyrri hálfleik. Hann keyrði þá á John Stones varnarmann Englands og setti boltann í gegnum klof hans og þaðan í markið. Aaron Ramsdale stóð í markinu og átti ekki séns.

Íslenska liðið varðist virkilega vel í leiknum og skipulag liðsins hélt vel, enska liðið virtist stundum ekki vilja keyra í hlutina af fullum krafti af ótta við meiðsli fyrir EM. Það nýtti íslenska liðið sér.

Hér eru einkunnir landsliðsmanna að mati 433.is.

Byrjunarlið Íslands:

Hákon Rafn Valdimarsson 8
Frábær og öruggur í öllum aðgerðum, ljóst að hann á orðið stöðuna og enginn getur ógnað henni

Bjarki Steinn Bjarkason 7
Kom skemmtilega óvart inn í byrjunarliðið, var í smá brasi í byrjun en vann sig vel inn.

Sverrir Ingi Ingason 8
Virkilega góður leikur hjá Sverri sem er svo yfirburða besti miðvörður íslenska landsliðsins

Daníel Leó Grétarsson 8
Daníel hefur notið þess að fá traustið frá Age Hareide og nýtt það mjög vel. Öflugur í kvöld.

Kolbeinn Birgir Finnsson 8
Virkilega öflug frammistaða Kolbeins, hans besta frammistaða varnarlega í íslenskum búningi.

Mikael Neville Anderson (´64) 7
Gerði virkilega vel í öllum varnarleik og studdi vel við bakið á Bjarka Steini, komst lítt áleiðis sóknarlega.

Jóhann Berg Guðmundsson (´83) 8
Varðist vel og hélt skipulagi liðsins, er að þróast í mikinn leiðtoga á miðsvæðinu.

Arnór Ingvi Traustason 8
Hljóp allar mínútur leiksins og varðist vel, er orðinn lykilmaður í því sem Hareide vill gera.

Jón Dagur Þorsteinsson 8
Gerði frábærlega í að taka markið sitt í fyrri hálfleik og var óheppin að skora ekki tvö, rann á rassinn í dauðafæri í seinni hálfleik

Hákon Arnar Haraldsson (´83) 9 – Maður leiksins
Mest skapandi leikmaður liðsins fram á við og varnarlega var Hákon einnig virkilega góður. Vonarstjarna liðsins fyrir næstu ár og er að taka við lyklunum að liðinu.

Andri Lucas Guðjohnsen 7
Fékk auðvitað úr litlu að moða en virðist vera orðinn fyrsti kostur Hareide í fremstu víglínu og það er auðvelt að skilja það, stór, sterkur og heldur bolta vel. Getur ógnað markinu.

Varamenn:

Stefán Teitur Þórðarson (´64) 6
Komst ágætlega inn í hlutina á þeim rúmu 25 mínútum sem hann spilaði.