Það eru eflaust skiptar skoðanir um hversu oft á að þvo handklæði og sængurver. Ef þú gerir það of oft, er hætt á að líftími handklæðanna og sængurveranna styttist en á móti kemur að þetta getur orðið hálf ógeðslegt ef þú bíður of lengi með að þvo þetta.

Sumir segja að baðhandklæði megi nota sjö sinnum áður en þau eru þvegin en aðrir vilja hreint handklæði í hvert sinn sem þeir fara í bað. Það eru einnig deildar meiningar um hversu oft á að þvo sængurver, ekki síst vegna þess að það getur verið erfitt að muna hvenær maður skipti síðast á rúminu.

Á vefsíðunni Goodhousekeeping.com er góð ráð að finna um þetta og margt annað. Á síðunni er því slegið fast að það sé ekki hægt að láta lyktarskynið ráða því hvenær handklæðin og sængurverin eru þvegin.

Meginreglan með sængurver að þau á að þvo á hálfsmánaðarfresti. Ef þú svitnar mikið á nóttunni, þá þarf að þvo þau vikulega. En það er nóg að þvo sængina og koddann tvisvar þrisvar á ári.

Baðhandklæði þarf að þvo oftar en sængurver, en samkvæmt því sem fram kemur á Goodhouskeeping.com á að þvo þau þegar búið er að nota þau 3-4 sinnum. Þetta er háð því að maður muni að hengja handklæðið upp og breiða úr því í rými þar sem loftar vel um.

Það má heldur ekki gleyma baðmottunni, sem er fyrir framan baðkarið eða sturtuklefann. Hana þarf að þvo vikulega.