Tveir svakalegir leikir fóru fram í Meistaradeild Evrópu í kvöld en í leikjunum tveimur voru tíu mörk skoruð, þar sex á Santiago Bernabeu. Um var að ræða fyrri leikina í átta liða úrslitum.

Manchester City heimsótti Real Madrid á Spáni í rosalegum leik þar sem gestirnir komust í tvígang yfir.

City byrjaði leikinn með látum þar sem Bernardo Silva skoraði beint úr aukaspyrnu en Ruben Dias varð fyrir því óláni að skora sjálfsmark. Staðan 1-1 eftir tólf mínútna leik.

Tveimur mínútum síðar skoraði Rodrygo og Real Madrid var komið yfir á heimavelli og þannig var staðan í hálfleik.

Í síðari hálfleik sótti City í sig veðrið og Phil Foden jafnaði leikinn með mögnuðu skoti, það var svo Josko Gvardiol sem kom City yfir með þrumuskoti fyrir utan teig. Hann hamraði í boltann með hægri fætinum sem er hans verri fótur og boltinn endaði í netið.

Fallegasta mark leiksins var svo líklega skorað á 79. mínútu þegar Federico Valverde þrumaði knettinum í netið. Lokastaðan 3-3 jafntefli fyrir seinni leikinn á Englandi.

Í London var FC Bayern mætt í heimsókn til Arsenal en þar var það Bukayo Saka sem kom heimamönnum yfir á sanngjarnan hátt. Serge Gnabry jafnaði fyrir gestina en markið var sætt fyrir kappann sem var áður hjá Arsenal en fékk ekki mörg tækifæri.

Það var svo Harry Kane sem kom Bayern yfir með marki úr vítaspyrnu en hann þekkir það vel að skora gegn Arsenal eftir dvöl sína hjá Tottenham.

Bayern spilaði vel í leiknum en skiptingar frá Mikel Arteta breyttu leiknum og það var Leandro Trossard sem kom inn af bekknum og jafnaði leikinn. Staðan 2-2 og þannig lauk leiknum en seinni leikurinn fer fram í Bæjaralandi.