Guðni tilkynnti í nýársávarpi sínu að hann hygðist láta staðar numið að loknu sínu öðru kjörtímabili og hafa þó nokkuð margir boðið sig fram til forseta að undanförnu.
Morgunblaðið segir frá því í dag að margir hafi hvatt Guðna til að sitja áfram, þar á meðal fólk sem Guðni hefur hitt á förnum vegi og á mannamótum. Þá hafi forsetaembættinu borist tölvupóstar um þetta.
Guðni er staddur í fríi í útlöndum en sagði í tölvupósti til Morgunblaðsins að hann hefði fengið áskoranir, beiðnir og spurningar um hvort hefja megi söfnun undirskrifta en sjálfur hafi hann ekki léð máls á slíku.
„Sem fyrr er ég þakklátur fyrir góðan stuðning. Ákvörðun um að láta gott heita er hins vegar það stór að henni verður ekki breytt nema afar ríkar ástæður séu til þess,“ segir Guðni en ekki liggur fyrir hvaða „ríku ástæður“ þurfi til að hann endurskoði ákvörðun sína.
