Breski leikarinn og sjónvarpsmaðurinn Stephen Fry kveðst ekki mæla með notkun Ozempic sem gagnast hefur mörgum í baráttunni gegn offitu. Fry opnaði sig um þetta í viðtali við Mirror.

Fry, sem er 66 ára, hefur lengi háð baráttu við aukakílóin og segir hann að árangurinn þegar hann byrjaði fyrst á lyfinu hafi verið stórkostlegur.

Eins og margir vita var lyfið upphaflega þróað gegn sykursýki en virka efni lyfsins, semaglutide, hefur hjálpað mörgum sem ekki glíma við sykursýki að léttast. Lyfið kom á bandarískan markað árið 2018 og var Fry einn af þeim fyrstu til að prófa lyfið.

Fry segir að lyfið hafi í fyrstu komið í veg fyrir langanir hans í óhollan mat og jafnvel áfengi, en með tímanum fór að bera á aukaverkunum sem gerðu honum lífið leitt.

„Á þessum tíma dvaldi ég í Bandaríkjunum og hafði lesið um lyfið. Ég spurði lækninn minn út í þetta og hann sagði að ég gæti prófað lyfið.“

Eftir að hafa notað Ozempic í eina viku eða tvær segir Fry að árangurinn hafi verið ótrúlegur. „Ég hugsaði með mér að þetta væri kraftaverki líkast. Mig langaði ekki í mat og ekki heldur áfengi og hélt að þetta yrði stórkostlegt.“

En svo fóru aukaverkanirnar að gera vart við sig. „Ég varð veikari og veikari og ég kastaði bókstaflega upp fjórum til fimm sinnum á dag. Ég gat þetta ekki,“ segir Fry sem hætti á lyfinu.

Meðal þekktra aukaverkana Ozempic eru einmitt ógleði, niðurgangur, kviðverkir og uppköst.