Ísrael hefur birt nýja útgáfu af framlagi sínu í Eurovision keppninni, sem fram fer í Malmö í maí. Var þeim bannað að nota upphaflega textann vegna pólitískrar skírskotunar.
Lagið, sem sungið er af Eden Golan, hét upphaflega „October Rain“ og vísaði til árása Hamasliða frá Gasa á Ísrael þann 7. október síðastliðinn. Í texta þess stóð meðal annars:
„Þeir sem skrifa söguna, standa með mér, horfðu í augu mín og sjáðu, fólk hverfur en segir ekki bless.“
Framkvæmdastjórn Eurovision, EBU, gerði athugasemdir við textann og hótaði að vísa Ísraelum úr keppninni myndu þeir ekki breyta framlagi sínu. Um tíma leit út fyrir að Ísrael myndi draga sig úr keppninni en að lokum sættist ísraelska ríkisútvarpið, KAN, á að breyta textanum.
Núna heitir lagið „Hurricane“ og allar pólitískar tengingar hafa verið hreinsaðar úr textanum.
„Ég er að keppa á erfiðu ári. En á hinn bóginn þá langar mig enn meira til að koma fram fyrir landið mitt, út af þýðingu þess, þetta hefur aukið vægi. Við getum sýnt allt sem við erum að upplifa, allt sem landið er að ganga í gegnum, á þessum þremur mínútum. Að tala til heimsins í gegnum lagið,“ sagði Golan þegar nýi textinn var opinberaður á sunnudagskvöld.
Auk lagsins með hinum nýja texta sýndi KAN heimildarmynd um vandkvæði Ísraela við að keppa í Eurovision í gegnum árin og sérstaka öryggisgæslu sem keppendur þeirra þurfa að hafa.
EBU samþykkti sérósk Ísraela um að þeir fengju að flytja lag sitt í seinni undankeppninni, fimmtudaginn 9. maí. Var það gert til þess að Ísraelar þyrftu ekki að halda æfingar fyrr um vikuna þegar þeir halda upp á minningardag um helförina. Ísland á að keppa þriðjudaginn 7. maí.
