Skúli Gunnar Sigfússon athafnamaður, sem þekktastur er fyrir að reka Subway staðina á Íslandi gerir umdeildar kröfur fjármálaráðherra fyrir hönd ríkisins um að ýmis landsvæði, þar á meðal stærstur hluti Vestmannaeyja, verði að þjóðlendum að umtalsefni í aðsendri grein á Vísi. Hann segir málið stórfurðulegt og spyr hvort ríkisvaldið á Íslandi sé komið á einhvers konar sjálfstýringu þar sem enginn vilji kannast við að hafa átt frumkvæði að málinu.
Skúli spyr í greininni hvaða tilgangi þessar kröfur þjóni og hvað eigendur ríkisins, fólkið í landinu, græði á þeim:
„Er eignarhaldið að fara að skila ríkinu tekjum? Ætlar ríkið að selja ferðir á Heimaklett eða til Grímseyjar eða að stunda dúntekju á eyjum í Breiðafirði? Er eignarhaldið á þessum eyjum og skerjum að fara að leysa vandann á bráðadeild Landspítalans … Er þjóðnýtingin að fara að hjálpa Grindvíkingum? Auðvitað ekki.“
Þórdís Kolbrún Reykfjörð Gylfadóttir fjármálaráðherra hefur vísað til þess að um sé að ræða ferli sem bundið var í lög um síðustu aldamót. Tilgangurinn með starfi óbyggðanefndar sé að eyða óvissu um eignarhald á landi. Skúli segir að ef slík óvissa sé til staðar færi betur á því að láta viðkomandi sveitarfélög sjá um hin umdeildu svæði. Ef málið snúist um náttúruvernd geti ríkið sett lög um slíkt án þess að taka landið til sín.
Skúli segir málið sett fram í algjöru tilgangsleysi, á meðan þjóðin glími við afleiðingar náttúruhamfara á Suðurnesjum, og án þess að nokkur viðurkenni að hafa átt frumkvæði að því:
„Miðað við fréttaflutning af málinu þá er eins og ríkisvaldið sé á einhvers konar sjálfstýringu að vinna að þjóðnýtingu, því hvorki ráðherrann né Óbyggðanefnd vilja vera í forsvari fyrir málið.“
Hann hvetur Þórdísi Kolbrúnu að lokum til að endurskoða þjóðlendulögin.
Grein Skúla er hægt að nálgast í heild sinni hér.
