Guðrún Inga Sívertsen, skólastjóri Verslunarskóla Íslands og fyrrum varaformaður KSÍ lýsir yfir stuðningi við Vigni Má Þormóðsson í framboði til formanns KSÍ. Fótbolti.net segir frá þessu.

Vignir er að berjast um stólinn við Guðna Bergsson og Þorvald Örlygsson en 147 fulltrúar kjósa til formanns eftir átta daga.

Guðrún Inga var lengi vel í stjórnunarstörfum hjá KSÍ og fer fögrum orðum um Vigni sem sat í tólf ár í stjórn KSÍ en hætti árið 2019.

„Eftir viku er ársþing KSÍ, en þar mun knattspyrnuhreyfingin kjósa sér nýjan formann. Í framboði til formanns er góður vinur minn, Vignir Þormóðsson. Við Vignir sátum saman í stjórn KSÍ frá 2007 til 2019 eða í tólf ár. Ég þekki því vel hans störf og veit hvaða sýn hann hefur á íslenska knattspyrnu. Samvinna og samstaða er það sem Vignir hefur ávallt haft að leiðarljósi í störfum sínum. Hann hefur óteljandi kosti sem munu nýtast honum í embætti formanns KSÍ hljóti hann kosningu. Hann er fyrrum formaður knattspyrnudeildar og veit hvaða áskoranir aðildarfélög KSÍ glíma við,“ skrifar Guðrún Inga og Fótbolt.net segir frá.

„Vignir hefur setið í ýmsum nefndum fyrir knattspyrnusambandið og m.a. í mótnefnd KSÍ síðan 2017, þar sem hann gegndi forystu fyrstu tvö árin, og þá hefur hann víðtæka þekkingu á verkefnum KSÍ, innanlands sem og erlendis. En umfram allt er Vignir dýrmætur sjálfboðaliði úr knattspyrnuhreyfingunni sem hefur unnið fyrir félagið sitt og fótboltann frá unga aldri. Hann hefur yfir þrjátíu ára reynslu af fyrirtækjarekstri, sem að mínu mati er mikill kostur fyrir þau fjölmörgu krefjandi mál sem bíða nýs formanns og stjórnar KSÍ.“

„Ég vona að aðildarfélögin kjósi reynslu og þekkingu þegar gengið verður til kosninga laugardaginn 24. febrúar. Þangað til held ég áfram hvetja vin minn áfram til dáða því ég veit að hann er frábær kostur í embætti formanns KSÍ. Svo skemmir ekki fyrir hvað hann er skemmtilegur og frábær félagi.“