Sagnfræðingurinn og íþróttaáhugamaðurinn Stefán Pálsson var gestur Íþróttavikunnar sem kemur út á 433.is, Hringbraut.is og í Sjónvarp Símans alla föstudaga. Helgi Fannar Sigurðsson og Hrafnkell Freyr Ágústsson hafa umsjón með þættinum.
Það vakti athygli þegar greint var frá því á dögunum að Hákon Rafn Valdimarsson væri á leið til enska úrvalsdeildarliðsins Brentford frá Elfsborg. Undanfarnir mánuðir hafa verið frábærir fyrir Hákon. Hann er orðinn aðalmarkvörður íslenska landsliðsins og var valinn besti markvörður sænsku úrvalsdeildarinnar einnig.
„Þetta er svolítið athyglisvert hvernig þróunin hefur verið hjá íslensku markvörðunum. Rúnar Alex var fyrir nokkrum mánuðum geirnegldur aðalmarkvörður. Þar áður var það Elías (Rafn Ólafsson) og menn töluðu um að Elías væri næsti markvörður í úrvalsdeildina í Brentford því hann var í Midtjylland. Hákon hefur einhvern veginn stolið senunni á nokkrum mánuðum,“ sagði Helgi.
Hrafnkell tók undir þetta.
„Ég þoli ekki að tala um ótrúlegar sögur en þetta er raunverulega ótrúleg saga því gæinn var í handbolta þegar hann var 15 ára og var við það að velja handbolta frekar en fótbolta. En Óskar tekur hann inn í Gróttu og spilar honum bara, sama þó hann geri mistök til að byrja með. Áður en við vitum af er hann kominn upp um tvær deildir á tveimur árum og að spila í efstu deild 19 ára.“
Stefán benti svo á áhugaverðan punkt.
„Markmenn eru líka miklu síður keyptir milli landa. Ef maður lítur yfir Afríku- og Asíukeppnina er alvanalegt að allir þrír markverðirnir séu að leika í heimalandinu. Þó allir aðrir séu hjá erlendum stórliðum.“
Umræðan í heild er í spilaranum.
