Íþróttaspekingurinn Mikael Nikulásson var gestur í Íþróttavikunni sem kemur út alla föstudaga á 433.is, Hringbraut.is og í Sjóvnarpi Símans. Helgi Fannar Sigurðsson og Hrafnkell Freyr Ágústsson hafa umsjón með þættinum.

Það hefur ekki farið framhjá neinum að fjársterkir aðilar dæli nú peningum inn í rekstur KR en félagið hefur farið mikinn á leikmannamarkaðnum.

„Mér finnst þetta gaman. Þeir eru að stinga upp í marga, Palli Kristjáns og þeir. Það er búið að hrauna yfir þá síðan þeir tóku við,“ sagði KR-ingurinn Mikael.

Rúnar Kristinsson var látinn fara í haust og Gregg Ryder er tekinn við. Mikael hefði viljað sjá Rúnar fá tímabil með þessa fjármuni á milli handanna.

„Ég vorkenni Rúnari Kristinssyni, sem er góður þjálfari og KR-ingur, ein mesta goðsögn í sögu KR. Þeir hafa vitað innst inni að það væri að koma seðill og þá reka þeir hann. Mér finnst það rannsóknarefni því hann náði frábærum árangri á sínum tíma. Hann gat ekkert gert betur með það sem hann hafði síðustu tvö ár. Svo kemur einhver Gregg Ryder og fær alla peningana.

En ég er ógeðslega ánægður með að KR sé að hrista upp í þessu. Þetta Breiðablik-Víkingur kjaftæði, að þau séu bara tvö í þessu, það er búið að slökkva í því. Nú verður öll krafan á að vinna titilinn og þeir eiga að berjast við Víking um hann,“ sagði Mikael.