Eldstöðvakerfin á skaganum hafa heldur betur minnt á sig á undanförnum árum og hefur verið bent á að Krýsuvík, Brennisteinsfjöll og Hengilsvæðið gætu farið af stað. Í þessu samhengi hefur verið rætt um byggingu frekari varnargarða, til dæmis við Hafnarfjörð og mikilvæga innviði á Hengilsvæðinu.
„Við þurfum að fara skynsamlega í þetta allt saman. Við þurfum ekki að fara að byggja varnargarða en við þurfum kannski að fara að hanna varnargarða og skoða hvernig þeir eigi að liggja og vera tilbúin að setja þá upp ef með þarf,“ segir Þorvaldur í samtali við DV og bætir við að fara þurfi í fyrirbyggjandi aðgerðir en ekki einhvers konar viðbragðsaðgerðir eins og raunin hefur verið.
Sjá einnig: Þorvaldur segir tvær sviðsmyndir líklegastar í stöðunni
„Það sem er búið að gera þarna í Grindavík með varnargarðana var viðbragð en ekki forvarnir. Við vorum að gera þetta þegar gosið var byrjað. Þá þarf að flýta sér svo mikið og taka snöggar ákvarðanir og það þurfa ekki alltaf að vera góðar ákvarðanir,“ segir hann.
Aðspurður hvort hann telji líkur á að til dæmis Krýsuvíkurbeltið fari í gang á næstu árum eða áratugum segir Þorvaldur:
„Já, já. Þetta fer allt saman í gang og það er bara spurning hvenær,“ segir hann og bendir á að vestanverður Reykjanesskaginn sé kominn í gang og það sé vel hugsanlegt að frekari atburðir verði á næstunni, hvort sem þeir enda með eldgosi eða ekki. Nefnir hann Sundhnúka og Fagradalsfjall þar sem eitthvað virðist vera í gangi miðað við jarðskjálftavirkni á svæðinu.
„Þessi virkni gæti færst yfir í Eldvörpin sem væri kannski betra frá ýmsum sjónarhornum enda lengra að innviðunum þar. Svo getur þetta farið út á Reykjanes og þar eru miklir innviðir undir.“
Ef horft er lengra fram í tímann, einhverja áratugi eða jafnvel út þessa öld, þá sé líklegt að kerfin í Krýsuvík, Brennisteinsfjöllum, Bláfjöllum og jafnvel Henglinum fari að rumska.
„Við vitum ekkert tímasetningar á neinu af þessu,“ segir Þorvaldur og tekur fram að þetta mun ekkert endilega gerast í einhverri ákveðinni röð. Það geti eitthvað gerst í Henglinum á undan til dæmis Krýsuvík eða Brennisteinsfjöllum.
„Það er þess vegna sem ég segi að við þurfum að fara huga að fyrirbyggjandi aðgerðum og skoða hvað er undir á hverjum stað,“ segir Þorvaldur og nefnir Hengilinn þar sem eru gríðarlega mikilvægir innviðir fyrir Reykjavík og höfuðborgarsvæðið.
Er það mat Þorvaldar að við þurfum að fara að vinna skipulega að því hvað við getum gert og hvernig er best að gera það. „Það þarf líka að fara í rannsóknir,“ segir Þorvaldur sem kveðst meðvitaður um að þetta kosti allt saman peninga. Þeir peningar gætu þó skilað sér margfalt til baka ef og þegar næstu kerfi fara af stað.
