DV skýrði frá þessu fyrr í vikunni.
Í kjölfar þessara ummæla ráðherrans ræddi Karlis Neretnieks, fyrrum rektor sænska varnarmálaskólans, við Aftonbladet um hver fyrstu skotmörkin verði ef til innrásar kemur.
Hann sagði að fyrsta skotmarkið verði fjarskiptakerfi og samskiptaleiðir. Reynt verði að lama þetta. „Fyrstu afleiðingarnar, sem bregðast þarf við, er líklega að Internetið, tölvupóstur og þess háttar mun ekki virka,“ sagði hann og benti á að án þessara innviða muni hlutar af samfélaginu ekki getað starfað eðlilega. Þetta á til dæmis við um lestarsamgöngur, greiðslukerfi og vatnshreinsun því allt er þetta háð tölvum.
Næsta skotmark óvinarins væri raforkukerfið að mati Karlis. „Ef ráðist verður á okkur, þá tel ég að reynt verði að lama raforkukerfið,“ sagði hann og bætti við að mikilvægt sé að Svíar undirbúi sig undir slíkt og geti brugðist hratt við og lagfært kerfið ef þörf krefur.
Suðurhluti landsins, Gotland, Blekinge og Skánn, yrðu síðan fyrstu svæðin sem óvinaher myndi ráðast beint á. Ef Rússar gerðu árás myndu þeir væntanlega reyna að ná suðurhluta landsins fyrst á sitt vald. Með því gætu þeir komið í veg fyrir að NATO gæti sent liðsauka í gegnum Eystrasaltið.
En það er ekki bara suðurhluti landsins sem verður í skotlínunni ef Rússar skyldu ráðast á Svíþjóð. Heimskautasvæðið yrði einnig framarlega í röðinni ef til árásar kæmi.
Stokkhólmur myndi líklega heldur ekki sleppa alveg þrátt fyrir að borgin sé ekki áhugaverð út frá hernaðarlegu sjónarmiði. En þar eru stjórnarbyggingarnar og ráðamenn eru staðsettir þar og því ekki útilokað að ráðist verði á stjórnarbyggingar.
Aðrir hlutar landsins verða hugsanlega ekki fyrir miklum áhrifum af stríði ef til þess kemur.
