Grindvíkingar sem það kjósa geta haldið jólin heima hjá sér í ár, því frá og með Þorláksmessu mega Grindvíkingar fara inn í bæinn allan sólarhringinn og jafnvel sofa þar. Þetta kemur fram í tilkynningu frá Lögreglustjóranum á Suðurnesjum. Staðan verður endurmetin þann 27. desember.

Einnig kemur fram að frá og með Þorláksmessu verði lokunarpóstar á Grindavíkurvegi, Nesvegi og Suðurstrandarvegi. Íbúar í Grindavík, eigendur fyrirtækja og starfsmenn þeirra hafi heimild til að fara inn fyrir lokunarpósta allan sólarhringinn og íbúar megi eins og áður sagði gista í bænum.

Óviðkomandi einstaklingum verði ekki hleypt inn fyrir lokunarpósta að svo stöddu. Helstu fjölmiðlar hafa heimild til að fara inn fyrir lokunarpósta.

Gosinu virðist lokið og almannavarnastig fært á hættustig

Sérfræðingar Veðurstofunnar hittust á fundi klukkan 9.30 í morgun þar sem farið var yfir nýjustu gögn og klukkan 13 fundaði Veðurstofan með lögreglustjóra og Almannavarnadeild ríkislögreglustjóra. Samkvæmt nýju hættumatskorti Veðurstofu er enn talin töluverð hætta á náttúruhamförum í Grindavík.

Ríkislögreglustjóri hefur ákveðið í samráði við lögreglustjórann á Suðurnesjum að færa almannavarnastig af neyðarstigi niður á hættustig þar sem eldgos, sem hófst við Sundhnúkagíga 18. desember virðist nú lokið.