Daníel Örn Sigurðsson töframaður segir að varaþingmaður Miðflokksins, Anton Sveinn Mckee, hafi bjargað lífi sínu á föstudagskvöld.

Hópur unglinga réðst á Daníel með höggum og spörkum við strætóskýli hjá Veitingastaðnum Aktu Taktu í Garðabæ, við Hafnarfjarðarveg. Anton var þar á ferð í bíl, stöðvaði og greip inn í átökin. Daníel segir í nýrri Facebook-færslu:

„Ég get ekki lýst því augnabliki þegar ég lá á götunni og starði í augun á manninum bakvið stýrið og reyndi að öskra eitthvað í líkingu við „hjálp“ vegna þess að ég man ekki eftir því. En þannig varð mér bjargað þetta kvöld. Þegar Anton Sveinn Mckee kom að mér liggjandi í blóði og hindraði að árásarmennirnir gengu frá mér dauðum með spörkum. Hann einfaldlega bjargaði lífi mínu og er ég honum mjög þakklátur.“

Sjá einnig: Daníel Örn er á batavegi eftir fólskulega og tilefnislausa líkamsárás – „Einbeittur brotavilji og ekkert annað“

Málið er nú til rannsóknar hjá lögreglu sem stórfelld líkamsárás en Anton Sveinn sagðist í viðtali við Vísir.is á laugardaginn undrast að enginn annar hafi gripið inn í atburðarásina en margir bílar keyrðu framhjá vettvanginum. „Það er eitthvað skrítið í gangi í íslensku samfélagi ef náungakærleikurinn er kominn svona langt niður,“ sagði hann.

Einn árásarmannanna gerði sig líklegan til að halda áfram að misþyrma Daníel eftir að Anton Sveinn hafði gripið inn í atburðarásina. Honum tókst hins vegar að halda aftur af honum þar til lögregla kom á vettvang.