Héraðssaksóknari hefur ákært Þjóðverja á fimmtugsaldri fyrir stórfellt fíkniefnalagabrot eftir að maðurinn flutti inn til landsins tæplega 53 kg af hassi, ætluðum til söludreifingar hér á landi.
Ákærði flutti efnin frá Spáni til Danmerkur og þaðan með farþegaferjunni Norrænu til Seyðisfjarðar, í bíl af gerðinni Peugot. Fíkniefnin voru falin í sílsum bílsins og í leynihólfi á milli vélar- og farþegarýmis.
Eftir komuna til landsins keyrði Þjóðverjinn til Akureyrar þar sem hann var handtekinn fimmtudaginn 13. nóvember árið 2025, en lögreglan fann efnin við leit í bílnum.
Fyrir utan að krefjast refsingar yfir manninum er krafist upptöku á efnunum, á bílnum hans og snjallsíma mannsins en hann er sagður hafa notað símann við brotið.
Málið var þingfest við Héraðsdóm Reykjavíkur fyrr í dag.
