Maður að nafni Danny Butterfield upplifði ótrúlegt kvöld á sínum tíma er hann lék með liði Crystal Palace sem spilaði við Wolves í FA bikarnum.
Um var að ræða leik árið 2010 en Butterfield skoraði þá þrennu er Palace sló Wolves úr leik í 3-1 sigri.
Sagan á bakvið þessa þrennu er mjög skondin en Butterfield var bakvörður og fékk tækifæri í fremstu víglínu sem kom öllum á óvart.
Neil Warnock, stjóri Palace, ákvað að setja Butterfield í framlínuna en hann var sjálfur steinhissa er hann heyrði fréttirnar.
,,Við vorum að selja Victor Moses svo það var pláss í framlínunni og ég átti auðvitað aldrei að fylla það skarð,“ sagði Butterfield.
,,Allt í einu á æfingu fyrir leikinn þá ákvað Neil að nota mig frammi og sagði við mig að þetta væri kerfið fyrir morgundaginn.“
,,Það var orðrómur í búningsklefanum að ég væri frammi í næsta leik og svo var þetta skrifað á töfluna fyrir leik. Þetta var frítt tækifæri fyrir mig að gera eitthvað sem enginn bjóst við.“
Butterfield útskýrði svo nánar hver hugsun Warnock var og má segja að hún hafi verið ansi undarleg.
,,Við fengum okkur sæti og hann sagði einfaldlega: ‘Jæja, konan mín átti draum í nótt. Danny Butterfield, þú ert fremstur.’
,,Ég var ekki einu sinni fyrsti kostur í hægri bakverði, Nathan Clyne lék í þeirri stöðu. Ég spurði ítrekað hvort hann væri að grínast.“
