Tveir þriðju þeirra sem taka afstöðu bera lítið traust til Seðlabankans. Traust til bankans hefur hrunið frá því í september 2021, en þá naut Seðlabankinn trausts nær 80 prósenta þeirra sem tóku afstöðu.

Þetta kemur fram í nýrri skoðanakönnun sem Maskína gerði í október. Leita þarf aftur til ársins 2012 til að finna Seðlabankann jafn trausti rúinn og nú en þá hafði bankinn ekki fyllilega náð vopnum sínum eftir bankahrunið hér á landi, en í desember 2008 báru einungis 10 prósent þjóðarinnar traust til Seðlabankans, enda voru seðlabankastjórarnir þrír látnir taka pokann sinn skömmu síðar.

Konur bera minna traust til Seðlabankans en karlar en traust til bankans eykst með vaxandi aldri. Engu að síður ber meirihluti svarenda í öllum aldurshópum lítið traust til bankans. Í aldurshópnum 18-29 ára bera 83 prósent þeirra sem taka afstöðu lítið traust til bankans og 71 prósent í aldurshópnum 30-39 ára. Þetta er þeir aldurshópar sem finna hvað mest fyrir gífurlegum vaxtahækkunum sem peningastefnunefnd bankans, undir forystu Ásgeirs Jónssonar, hefur staðið fyrir undanfarin tvö og hálft ár. Þetta er fólkið sem er að jafnaði með mikla skuldabyrði vegna húsnæðiskaupa

Þá eykst traust til Seðlabankans eftir því sem menntunarstig er hærra en engu að síður ber ríflegur meirihluti svarenda í öllum menntunarhópum lítið traust til bankans.

Traust til Seðlabankans eykst með hækkandi heimilistekjum en meirihluti svarenda í öllum tekjuhópum ber hins vegar lítið traust til bankans.

Athyglisvert er að 70 prósent kjósenda Sjálfstæðisflokksins, sem afstöðu taka, bera mikið traust til Seðlabankans. Sama gildir um 66 prósent kjósenda VG, Rétt rúmur helmingur kjósenda Framsóknarflokksins, sem afstöðu tekur, ber hins vegar lítið traust til bankans.

Mikill meirihluti kjósenda allra stjórnarandstöðuflokkanna á þingi ber hins vegar lítið traust til Seðlabankans og nær 90 prósent þeirra sem segjast myndu kjósa Sósíalistaflokkinn bera lítið traust til bankans.