Hanna Rún var gestur í Fókus, spjallþætti DV, í síðustu viku og fór meðal annars yfir langan og árangursríkan dansferil, athyglina, umtalið og móðurhlutverkið.
Hanna Rún fann sína köllun snemma. Hún byrjaði að æfa dans aðeins fjögurra ára gömul og vissi strax að það væri ekki aftur snúið.
Síðan þá hefur hún landað hverjum titlinum á fætur öðrum og er í dag með fremstu samkvæmisdönsurum í heimi. Hún kom nýlega heim frá Þýskalandi þar sem hún og eiginmaður hennar og dansfélagi, Nikita Bazev, komust í úrslit á Evrópumeistaramótinu og lentu í fimmta sæti.
Í þættinum útskýrir Hanna hvernig danskeppnir fara fram og hvers konar þjálfun hún fékk þegar hún var yngri.
„Þetta er samhæfing og æfing,“ segir hún um hvernig það er að keppa á dansgólfi ásamt mörgum öðrum pörum.
„Þetta var einmitt æfing sem var mikið gerð þegar ég var lítil, þá vorum við með þjálfara frá Þýskalandi og þeir köstuðu stólum inn á gólfið þegar við vorum að dansa. Þá þurftum við að vera tilbúin að fara framhjá án þess að [bregða]. Svo ýttu þeir á okkur til að sjá hvernig við myndum detta, því það getur gerst og við þurfum að geta dottið „með stæl“ og helst þannig að það sjáist ekki,“ segir hún.
Aðspurð hversu gömul hún hafi verið á þeim tíma segir Hanna að þetta hafi verið fyrir fermingaraldur.
„Æfingarnar „í denn“ voru allt öðruvísi en í dag,“ segir hún og bætir við að klæðnaður á æfingum átti að fylgja vissum reglum, auk þess var mikill agi.
„Ef maður var eitthvað að trufla var manni hent út, maður bar virðingu fyrir kennaranum. Þetta er svolítið öðruvísi í dag.“
„Ég er ótrúlega þakklát fyrir þá kennslu sem ég fékk þá. Þetta var svo mikill agi. Þetta er erfiðara í dag, aginn og kennarar og þjálfarar þurfa að passa sig rosalega, hvað er sagt og fara varlega svolítið. Það eru bara breyttir tíma,“ segir Hanna Rún.
„En foreldrar og við krakkarnir bárum rosalega mikla virðingu fyrir þjálfurunum. Þegar maður mætti þá hlustaði maður, maður rétti upp hönd, maður lagði sig 110 prósent fram á æfingum. Ég er mjög ánægð að hafa verið með þessa þjálfara. Þeir voru strangir og maður grét og það blæddi úr fótunum, en maður gat fengið plástur.“
Fylgstu með Hönnu Rún á Instagram.
Hlustaðu á þáttinn á Spotify.
