Það voru margir Argentínumenn reiðir eftir að hafa heyrt ummæli Francis páfa sem hann lét falla fyrir helgi.

Páfinn er sjálfur Argentínumaður og er fæddur árið 1936 en hann fylgist vel með fótbolta og hefur gert til margra ára.

Hann var spurður að því hver væri besti fótboltamaður sögunnar en nefndi ekki Lionel Messi né Diego Maradona.

,,Messi eða Maradona?“ var spurningin sem páfinn fékk og var hann fljótur að svara: ,,Ég bæti við þeim þriðja, Pele.“

Það er oft deilt um hver sé besti leikmaður allra tíma en nafn Pele er svo sannarlega vinsælt í þeirri umræðu en hann lést 82 ára að aldri undir lok síðasta árs.

Argentínumenn eru þó alls ekki ánægðir með ummælin en bæði Messi og Maradona eru frá Argentínu líkt og páfinn sjálfur.