Íþróttavikan heldur áfram að rúlla á 433.is og í Sjónvarpi Símans á svæði Hringbrautar. Helgi Fannar Sigurðsson og Hrafnkell Freyr Ágústsson hafa umsjón með þættinum og að þessu sinni var gestur Gunnhildur Yrsa Jónsdóttir, leikmaður Stjörnunnar.
Gunnhildur hefur gefið af sér gott orð sem yfirþjálfari hjá Öspinni. Þar þjálfar hún börn með sérþarfir.
„Við erum orðin sameinuð með Stjörnunni. Nú er þetta Stjarnan/Öspin. Ég er að reyna að koma þessu inn í hefðbundin íþróttastarf.
Síðan 2011 hef ég unnið með einstaklingum með fatlanir í fótbolta og ég vissi að þegar ég kæmi heim væri þetta eitthvað sem ég vildi byrja að gera aftur,“ segir Gunnhildur um starfið í þættinum.
„Við erum með 40 einstaklinga, börn og fullorðna. Þetta er frábært og algjörlega þörf á þessu hér á landi, að bjóða upp á fleiri íþróttir fyrir þessa krakka.
Íþróttir hafa gert ótrúlega mikið fyrir mig. Ég væri ekki ég ef ekki væri fyrir fótboltann. Það er ótrúlega mikið sem ég hef skapað í gegnum fótboltann. Ég ímyndaði mér að ég hefði ekki þessi tækifæri af því ég væri með einhverjar sérþarfir. Fyrir mér snýst þetta um að íþróttir eru fyrir alla og að allir eigi rétt á að velja sína íþrótt.“
Umræðan í heild er í spilaranum.
