Sævar Atli Magnússon, leikmaður Lyngby, segir það hafi verið einstök stund þegar Gylfi Þór Sigurðsson mætti aftur á völlinn í gær.

Gylfi var að spila sinn fyrsta knattspyrnuleik í 852 daga en hann kom einmitt inn á fyrir Sævar í leik Lyngby gegn Vejle í gær.

„Þetta var bara geðveikt. Ég er þvílíkt ánægður fyrir hans hönd. Maður hefur séð það á æfingum undanfarnar tvær vikur að hann er að vaxa og verða betri með hverjum deginum. Hann mun verða þvílíkt mikilvægur fyrir okkur,“ sagði Sævar við 433.is eftir leik í gær.

„Maður horfði á hann þegar maður ólst upp og þetta var besti leikmaður okkar Íslendinga. Nú er ég búinn að spila með Alfreði Finnbogasyni með félagsliði og svo kemur Gylfi. Þetta er hálf súrealískt. Ég mun reyna að nýta þetta til hins ítrasta og reyna að læra af honum. Hann er að gefa mikið af sér og það er geðveikt að fá hann inn.“

Næst vill Sævar auðvitað spila með Gylfa í íslenska landsliðinu.

„Vonandi. Ég veit að það er markmiðið hjá honum og ég held hann ætli sér að slá þetta markamet. Ef hann heldur áfram að spila verður hann alltaf í landsliðinu.“

Ítarlegt viðtal við Sævar má nálgast í spilaranum.