Íþróttavikan heldur áfram að rúlla á 433.is og í Sjónvarpi Símans undir hlekk Hringbrautar. Helgi Fannar Sigurðsson og Hrafnkell Freyr Ágústsson hafa umsjón með þættinum og gestur þeirra að þessu sinni var Ríkharð Óskar Guðnason, Rikki G.

Ríkharð heldur úti afar vinsælu fótboltahlaðvarpi, Þungavigtinni. Þar eru spekingarnir Kristján Óli Sigurðsson og Mikael Nikulásson með honum. Ríkharð var spurður út í hvernig væri að vinna með þessum stóru karakterum.

„Stórir karakterar er heldur betur vel orðað hjá þér. Heilt yfir gengur samstarfið mjög vel. Þeir eru með mjög miklar skoðanir, ekki bara í þættinum sjálfum heldur hvað á að vera inn í þeim þegar þeir eru búnir og þar fram eftir götunum,“ segir Ríkharð léttur í þættinum.

„Það er ekkert alltaf eitthvað gáfulegt sem er sagt í þessum þáttum. Það eru stórir hlutir sagðir og það heldur ekkert allt vatni.“

Heitar umræður skapast oft í þáttunum en ekkert af því er tilgerð.

„Þeir rífast eins og hundur og köttur. Fólk heldur að þeir séu í einhverjum karakter í þættinum en það er alls ekki þannig. Þetta er líka fyrir og eftir þætti.“

Umræðan í heild er hér að neðan.