Það eru ekki allir sem geta sagt frá því að hafa fundað með goðsögninni Roy Keane sem lék lengi fyrir Manchester United.

Mido, fyrrum leikmaður Tottenham, er þó einn af þeim en Keane hafði áhuga á að fá sóknarmanninn til Sunderland árið 2006.

Mido sem er frá Egyptalandi var alls ekki hrifinn af vinnubrögðum Keane sem bauð stjörnunni upp á mat á ódýrum pítsastað.

Harðhausinn Keane hafði lítið að segja á þessum stutta fundi sem þeir áttu saman og var Mido ekki lengi að taka ákvörðun um það að hann myndi ekki ganga í raðir Sunderland og spila fyrir Írann.

,,Umboðsmaðurinn minn sagði við mig að Roy Keane hefði áhuga á því að ræða saman yfir hádegismat og sýna mér æfingasvæðið,“ sagði Mido.

,,Ég ákvað því að fljúga til Newcastle og hann sótti mig á sínum Range Rover. Ég fór svbo til Sunderland og hann bauð mér mat á Pizza Express.“

,,Ég var svo hissa því hann sagði í raun ekki neitt. Yfirleitt þegar þú býður leikmanni í hádegismat þá reynirðu að sannfæra hann um að koma til félagsins en hann var svo hljóðlátur.“

,,Ég vissi um leið að það væri ekki möguleiki að við gætum unnð saman, þetta hefði endað með slagsmálum. Þegar hann talaði við mig starði hann á loftið.“