Joe Lewis eigandi Tottenham vill selja Harry Kane, stjörnuframherja liðsins, ef hann skrifar ekki undir nýjan samning í sumar.

Kane á aðeins ár eftir af samningi sínum við Tottenham og hefur hingað til ekki viljað framlengja.

Fyrr í sumar var enski framherjinn orðaður við Manhcester United en nú virðist Bayern Munchen líklegri áfangastaður. Tottenham hefur hafnað tveimur tilboðum þýska risans í Kane.

Daniel Levy stjórnarformaður Tottenham er grjótharður í viðræðum og vill 100 milljónir punda fyrir Kane, þrátt fyrir samningsstöðuna. Ólíklegt er að nokkurt félag gangi að þeim verðmiða.

Lewis hefur hins vegar nú látið Levy vita að það þurfi að selja Kane í sumar ef hann skrifar ekki undir nýjan samning. Talið er að hann sé með tilboð á borðinu sem myndi færa honum 400 þúsund pund á viku fyrir að vera áfram.