Vísir.is hefur beðið Guðjón Pétur Lýðsson miðjumann Grindavíkur afsökunar á því að hafa ýjað að því að hann hefði verið með kynþáttafordóma eftir leik Gróttu og Grindavíkur á sunnudag.

Allt sauð upp úr að leik loknum og var Guðjón í þeim áflogum en hann hafnaði því frá byrjun að hafa verið rasisma við leikmann Gróttu.

„Í upprunalegri frétt Vísis um málið var sagt að orðrómur hefði verið um að Guðjón Pétur væri sá seki þar. Það var dregið til baka í uppfærðri frétt daginn eftir og Vísir hefur nú sannreynt að Guðjón kom þar hvergi nærri. Íþróttadeild biður Guðjón Pétur afsökunar á því að hafa dregið nafn hans í þann anga málsins á því stigi,“ segir í frétt sem Vísir hefur nú birt.

Guðjón fagnar því í færslu á Facebook að Vísir hafi viðurkennt mistök sín. „Þá er það komið á hreint , enda eitthvað sem ég myndi aldrei í lífinu gera. Það er vonandi að þetta verði til þess að fjölmiðlar vandi sig með birtingu á fréttum og að birta ekki fréttir sem engin fótur er fyrir. Ég fyrirgef Vísi eftir að þeir tóku ábyrgð á þessum mistökum það er engin fullkominn og þessi blaðamaður sem skrifaði þessa frétt lærði vonandi að svona skrifar ruslmiðill en ekki fréttamiðill sem vill láta taka mark á sér,“ skrifar Guðjón

„Skaðinn er því miður skeður eftir að þessi fyrirsögn fór í loftið og það munu líklega ekki allir sem lásu upprunalegu fréttina sjá þessa afsökunarbeiðni en vonandi fer þessi afsökunarbeiðni sem lengst til að leiðrétta þessa vitleysu.“