Dan Gosling, fyrrum leikmaður Watford, hefur tjáð sig um afskaplega erfiða tíma hjá félaginu árið 2022.

Watford féll þá úr ensku úrvalsdeildinni en liðið var heilum 15 stigum frá öruggu sæti er tímabilið var flautað af.

Þrír þjálfarar voru hjá liðinu á aðeins einu tímabili en leikmenn liðsins sýndu lítinn sem engan áhuga á að reyna á sig í leikjunum undir lokin.

,,Við vorum með leikmenn á þessum tíma sem komu til æfinga segjandi að þeir væru búnir að fá upp í kok af stöðunni,“ sagði Gosling.

,,Liðið var á leið niður og við vorum með leikmennn sem vissu að þeir væru á förum. Þeir hugsuðu bara um að þeir væru búnir og voru að horfa annað.“

,,Ég taldi þetta hugarfar vera til skammar, það voru margir sjálfum sér til skammar og það var ástæðan fyrir því að félagið féll niður um deild.“

,,Þetta snerist ekkert um hæfileika, sumir leikmenn voru ekki að spila eins vel og þeir gátu einstaklingslega séð. Þetta var allt til skammar, versti búningsklefi sem ég hef verið hluti af.“

Gosling hélt svo áfram og tjáði sig um stjóra liðsins á þessum tíma, Claudio Ranieri, sem vann deildina með Leicester árið 2016.

,,Þessi tími með Ranieri var ekki skemmtilegur. Allt sem tengdist hans komu var ömurlegt, starfsfólkið og hugarfarið. Þeim leið ömurlega þarna sem lét öðrum líða ömurlega.“

,,Það kom mér á óvart að þetta teymi hafi náð fjórum mánuðum í starfi. Ég hef verið í fótboltanum lengi og þetta var eins slæmt og það getur orðið.“