Landsliðskonan Anna Björk Kristjánsdóttir gekk á dögunum í raðir Vals frá ítalska stórveldinu Inter. Hún horfir sátt til baka á tímann á Ítalíu.

Hin 33 ára gamla Anna kom til Íslandsmeistara Vals eftir tvö góð ár hjá Inter. Valur var efstur í huga eftir að hún ákvað að snúa heim til Íslands.

„Ég heyrði í fleiri liðum en það svosem kom ekkert annað til greina. Ég hef heyrt í Val í nokkur ár núna. Það hefur verið tékkað á mér þaðan reglulega. Hugurinn var því svolítið að fara í Val og þegar við byrjuðum að ræða saman kom lítið annað til greina,“ segir Anna í samtali við 433.is.

Það var þó ekki auðveld ákvörðun að yfirgefa Inter.

„Ég var að hugsa í fyrra hvort ég ætti að taka eitt ár í viðbót eða fara heim. Ég var ekki tilbúinn að yfirgefa Inter í fyrra og það var líka erfitt núna. Mér leið gífurlega vel þarna. Þetta var erfið ákvörðun en ég er sátt með hana.

Ég er virkilega sátt með að hafa endað atvinnumannaferilinn í Inter. Það var virkilega gott lið, mjög faglegt allt í kringum liðið. Ég spilaði vel og leið vel í liðinu. Að enda þarna var eiginlega fullkomið og það var gott að ganga frá borði sátt.“

Anna er í íslenska landsliðshópnum sem mætir Finnum í vináttuleik nú klukkan 18. Hún ræðir leikinn og fleira í viðtalinu sem má nálgast í heild í spilaranum.