CNN greindi frá því fyrr í dag að forstjóri Disney, Bob Iger, hafni alfarið fullyrðingum þeirra sem halla sér hvað lengst til hægri í bandarískum stjórnmálum um að fyrirtækið hafi staðið fyrir framleiðslu á kvikmyndum og sjónvarpsþáttum sem innihaldi óviðeigandi, kynferðislegt efni.

Hann segir hugmyndir um að Disney sé að kynlífsvæða börn séu bæði fáránlegar og ósannar.

Ron DeSantis ríkisstjóri í Flórída og frambjóðandi til forsetaefnis Repúblikanaflokksins í forsetakosningunum í Bandaríkjunum á næsta ári er meðal stjórnmálamanna sem hafa haldið slíku fram. Undanfarið ár hefur hann átt í opinberum deilum við fyrirtækið og sagði fyrr á þessu ári að Disney hefði bætt kynferðislegu efni við dagskrárgerð sem beinist að ungum börnum.

Árásir af þessu tagi fóru fyrst að beinast gegn Disney fyrir tveimur árum þegar fyrirtækið andmælti lögum í Flórída sem bönnuðu skólum í ríkinu að kenna börnum upp að 9 ára aldri um kynhneigð og kynvitund. Bannið hefur nú verið hert enn frekar og gildir fyrir börn allt í upp 14 ára.

Síðan þá hafa Flórída-ríki og Disney deilt fyrir dómstólum um stjórn á sérstöku skattasvæði þar sem skemmtigarðurinn Disney World er meðal annars. DeSantis segir Disney vera „woke“ og notar óspart árásir sínar á fyrirtækið, bæði lagalegar og munnlegar, í stjórnmálabaráttu sinni.

Bob Iger sagði ákvæði stjórnarskrár Bandaríkjanna um tjáningarfrelsi veita Disney rétt til að lýsa yfir andstöðu við stefnu ríkisstjórans sem sé að hefna sín á fyrirtækinu og það sé verulegt áhyggjuefni.

Í síðasta mánuði mátti sjá mótmælendur veifa nasistafánum fyrir utan Disney World sem Iger sagði vera hryllilega sjón. Hann segir fyrirtækið frekar einbeita sér að því að segja sögur en að vera í stríði við hægri sinnaða stjórnmálamenn og fjölmiðlamenn.

Iger segist ekki vilja að fyrirtækið dragist inn í eitthvað menningarstríð (e. culture wars).