Dómarinn Marco Serra mun ekki dæma í ítölsku A deildinni næsta vetur samkvæmt Sky Italia.

Serra er nafn sem komst í fréttirnar á síðustu leiktíð eftir brjálæðiskast Portúgalans Jose Mourinho hjá Roma.

Mourinho er stjóri Roma en hann brjálaðist eftir leik Roma við Cremonese í Febrúar og lét Serra ítrekað heyra það á hliðarlínunni.

Serra er sagður hafa svarað Mourinho fullum hálsi og sagði þá: ,,Skiptu þér að þínum eigin málum, sestu niður, allir eru að hlæja að þér.“

Mourinho snöggreiddist eftir að Roma fékk ekki aukaspyrnu í leiknum en hann hafði verið duglegur að öskra á hliðarlínunni allan leikinn.

Samkvæmt Sky fær Serra ekki að dæma í Serie A á næstu leiktíð.